بلوچستان ءَ طوفانیں ہوراں پد سئے مردم بیران بوتگ ۔ کچائیں لوگ کپتگ انت دو مردم ہار ءَ بُرتگ ، نوشکی زنگی ناوڑ گوٛرم ءِ حفاظتی بند پُرٛشتگ۔ تفتان ءَ یکشلیں ہوراں پد مزنیں ہار اتکگ۔
صحبت پور ءَ گرئند کپگ ءَ پد 18 گوسفند مُرتگ۔ سنجاوی ءَ ترٛندیں ہور ءُ ہاراں پد کشّ ءُ گوٛرءِ میتگ ہارءَ گِپتگ انت۔ کوئٹہ ءَ یکشلیں ہوراں پد سریاب ءَ اربن فلڈنگ ءِ جاور ودی بوتگ ءُ یک مردمے ہارءَ بُرتگ۔ آپ ءِ زور ءِ سبب ءَ دگّ ءِ یک کشے جہل ءَ نشتگ۔
پشین ءَ ترٛندیں ترٛونگلاں سبزیں کشار تاوان داتگ انت۔
جمعہ ءُ یک شمبہ ءَ چاغی ، نوشکی ، گوٛادر ، کوئٹہ ، پشین ، کیچ ، ہرنائی ، بارکھان ، ژوب ، آواران ءُ کش ءُ گوٛراں ہورءَ گوٛرتگ۔ تربت ، خاران ، قلات ، مستونگ جہل مگسی نصیر آباد، سبی ، کوہلو ، ڈیرہ بگٹی ءُ اے دگہ جاہاں گوں ترٛندیں سیاہ گواٛت ءَ ہور ءَ گوٛرتگ۔
ہور ءُ ہاراں پد بازیں جاہاں روڈ ءِ ہار ءِ برگ ءِ سبب ءَ راہ بند بوتگ انت۔