(رچرڈ فاک ءِ نِزّ ءَ ٹیررزم ءِ دو طاقت: آشوبی ءُ کارگُزاری پرّیسی چمشانکے)
رچرڈ اے فاک وتی نبشتانک ’ریولوشنریز اینڈ فنکشنریز: دہ ڈوئل فورس آف ٹیررزم‘ ءَ دو قسم ءِ ٹیررزم نشان کنت، یکے ءَ آشوبی ءُ دومی ءَ کارگُزاری (فنکشنری) گوٛش اَنت۔ آشوبی ٹیررزم بی٘رگیں سیکولر فکر داریت ءُ اِستان ءَ سرجم ءَ وتی دستاں کنگ لوٹیت، البتہ کارگُزاریں ٹیررزم اِستان ءِ پلّہ مرزی ءَ کار کنان ءَ آئی ءِ نیوکلئیر سِلاہاں ہم کار بندیت۔ چونائیا ہر دوئینانی میان ءَ ہچ وڑیں سیادی نیست، بلئے کارگُزارین دائم مارکسی لیکہ ءِ بگی٘ر (خلاف) بیت۔ البتہ میکیاویلی ءِ سیاسی فکرانی رِد ءَ بِہ چارئے گڑا آشوبی ءُ کارگُزاری ماں ماڈرن اِستان ءَ شَرّ گوٛشگ نہ بنت، پرچاکہ ہر دوئینانی گوٛرا جنگّ پیداک کنوکیں فکرانی دیم ءِ دارگ ءِ درگتءَ راستیں توجیل نیست۔
فاک چونائی ءَ اے گپ ءِ سرا میّنیں وڑے ءَ زور دنت کہ ٹیررزم پہ میان اُستمانی زند ءَ چو یک راستی یے ءَ مانگ ءَ اِنت، پرچاکہ ما اَنچیں عَہدے ءَ زندگیں کہ سِلاہ ہم مزنیں حدے ءَ ٹِکنالوجی ءَ گوں بندوک اَنت ءُ ہر اڑءُجیڑہ ہما دمان ءَ مردمانی تہا شنگیت ءُ زندمان ءِ بہر بیت۔ اے وڑیں ساعتاں اَنچیں سرکارے جوڑ بیت کہ ہر اڑءُجیڑہ ءَ پاد پِر دنت ءُ مہلوک ءَ جَہل جنت، پدا آئی ءِ فارن پالیسی ہم دیمرویں نہ بنت بلکیں برگشتگین بنت۔ سیاسی شِدّت (violence) اَنچو ٹہینگ بنت کہ ملٹری حکمت عملی ءِ ہُنر گوٛشگ بنت، ءُ یکشلہ شِدّت اِستان ءِ ربیدگانی بہر جوڑ بیت کہ وڑ وڑیں پیچ ءُ تابی ءَ گوں مردمانی زندمان ءِ بہر بیت۔ اے وڑ پمیشکہ بیت کہ ماڈرن زندمان ہر وڑا امروز ءِ ای٘دگہ چیزاں گوں بندوک اِنت۔
فاک اے جیڑہانی یک عمل شناسیں (پریگمیٹک) توجیلے اے وڑا دنت کہ پرکءُپی٘ر ءُ بےجائزیں سیاسی شِدت ایر جنگ بہ بنت ءُ ربیدگی رِدءَ توجیلے شوہازگ بہ بیت کہ آ ربیدگ مردمانی یکجاہی ءَ دلبڈی بہ دنت ءُ بہ رکّینیت۔ بلئے پہ اے کار ءَ ہم یک سیاسی شِدتے لوٹیت۔ اے سیاسی شدت ماں یک محکمیں کمیونٹی ءَ جائز لیکگ بیت کہ اودءَ ہما میان استمانی رہبندانی رندگیری بیت کہ پہ گیشتریں مردماں مَنّ اِتگین اَنت۔ سیاسی شدت ءِ اے داتگیں توجیل، ٹیررزم ءِ دارگ ءِ درگتءَ شہریاں چہ اے سیاسی چِستءُای٘راں دیر داریت کہ جَہل ءَ داتگ اَنت۔
۔۔۔ اِستان ءِ سیاسی مقصد ہمیش بیت کہ آ دائم اے حیال بہ کنت کہ پہ شَہریانی رکینگ ءَ اِستان ءِ بُوئگ ہژدری اِنت
۔۔۔ اِستان ءِ اخلاق شناسی چہ آشوبیانی اخلاق ءَ دائم بُرزتِر ءُ جوٛانتِر بہ بیت۔
۔۔۔۔پہ کارآمد ءُ عملی سیاسی گامگیج ءَ الّمی اِنت کہ ٹیررزم ءَ زندمان ءِ ہر پہنات ءَ بِہ کشّیت ءُ چگل بہ دنت۔
۔۔۔۔ پہ سیاسی شدّت ءِ کارآمد ءُ عملی کنگ ءِ درگتءَ یک اخلاقی بنیاد یا سیاسی پَیمے (اسٹرکچرے) درکار بہ بیت۔
بُرز ءِ اے نکتہ بُنکی سبب زانگ بنت کہ ٹیررزم ءَ ماں زندمان ءَ ہوار گیج اَنت۔ اے وڑی ءَ ٹیررزم سیاسی ہمسنگی ءِ تہا ہم مانشُردگ بیت کہ کمءُگیش ٹیررزم ہُنرے ءَ گوں زندمان ءِ تہا ٹہینگ بیت، زانتکار یا سوبمندیں وڑے ءَ اے زند ءِ ہر پہنات ءَ گون کپیت۔ اگاں شَرّیں وڑے ءَ بِہ چارئے، گڑا ٹیررزم ءِ ہلاسی ءِ معنا ہمیش بیت کہ اول سرا نیوکلئیر سِلاہ ہلاس کنگ بہ بنت، پرچاکہ نیوکلئیر سِلاہ کارگُزاریں ٹیررزم ءَ رودیننت ءُ رکّیننت۔ ہمے کارگُزاری دائم آشوبیاں سکین دینت کہ اِستان ءَ سرجم ءَ وتی دستاں بہ کن اَنت کہ آشوبی وتی بی٘رگ پسندی ءِ سرا کاربند اَنت ءُ زندمان ءِ ہر پہنات ءِ تہا گون کپنت۔
فاک گوٛشیت کہ ماڈرن اِستان میکیاویلی ءِ سیاسی فکر ءِ رِدءَ ٹہینتگین اَنت بلئے ٹیررزم ہمنچو کوٛہن اِنت اَنچوکہ سرکار ءُ سلاہبندیں جُہد کوٛہن اَنت۔ اے وڑا اِستان ءِ ماڈل ہچبر ٹیررزم ءِ جیڑہ ءَ توجیل کُت نہ کنت۔ فاک ءِ نبشتانک ءِ وانگ ءَ پد من اے سرپد باں کہ اے نبشتانک ءَ ندکار ءَ گُمان بستگ کہ آئی ءَ لبرل راجمانی پیمان (سوشل کنٹریکٹ) ءِ پلّہ مرزی کنگی اِنت کہ اے پیمان حیر ءِ لیکہ ءَ ہچ وڑا میّن نہ کنت ءُ زندمان ءَ یک سرجمیں رہبندے نہ دنت کہ زند ءِ ہر پہنات ءَ وتی تہا جاہ بہ دنت، لبرل پیمان ءِ تہا نفر ہر وڑیں حیرے ءِ گچین کنگ ءُ زُورگ ءِ درگتءَ آزات اِنت کہ وتی ذاتی فائدہ ءَ بہ رکّینیت، بیدء یک راستی ءِ لیکہے ءِ مَنّگ ءَ۔ پمشیکا فاک یک حاکمیں کمیونٹی ئے ءِ سوج ءَ دنت، منا سما بیت کہ اے کمیونٹی یک لبرل کمیونٹی ئے کہ اُودءَ ہر نفر ءَ عَہدءُپیمانے ءَ گوں رضا اِنت کہ دو سوب (اپرچیونٹی) پہ وتا بُہ زُوریت اول آ چی کُت کنت ءُ دومی پہ آزاتی یا ذاتی فائدہ ءِ درگتءَ کُجام کار پہ آئی ءَ کنگ ءَ آمادہ اَنت۔ پرچاکہ نفر ءَ اے حق ہست کہ وتی ذاتی فائدہ ءَ بِہ رکّینیت کہ ہمے ذاتی فائدہ شہریانی یکجاہی ءِ عزت ءِ رکّینگ ءِ بُن اصلی سبب بیت۔