اگاں من گپ ءَ چہ اِدا بِہ گراں کہ ہستیں وہد ءَ روبرکتی ملک کپیٹلزم ءَ گوں اَنچیں قانونانی جہگیری ءَ کنگ ءَ اَنت کہ آ نفری آزاتی ءَ انسانی زند ءِ بُن اصلی جوٛازَت (کیپیسٹی) سرپد بیت۔ زانتکار اے قانوناں نرمیں قانون (سوفٹ لاء) گوٛش اَنت۔ دومی نیمگا رودَرتک ءِ طاقتوریں مُلکاں ہوار کوریا تُرندیں قانون ءِ نشونی ءَ دیّگ ءَ اَنت۔ بلئے اے دوئیں نیمگ ءِ مُلک دیمروی کُتگیں مُلک اَنت۔ مروچاں تُرکی ءُ انڈیا پمیشکا معاشی دیمروی ءَ گوں جُنزان اَنت کہ آ پہ مانشولی بُوَگ ءَ (گلوبلائز) نرمیں قانون ءِ بنیاد ءَ کارگِریں رَبید (آپریٹنگ سسٹم ) ءَ قانونی رِد ءَ کاربند بُوَگ ءِ اجازت دِیّگ ءَ اَنت۔ آ پہ وتی حاکمی ءِ حق ءِ برجاہ دارگ ءَ تُرٛندیں قانون ءَ کارمرز کنگ ءَ اَنت۔ پرچاکہ آہاں ’دیمروی نہ کُتگیں مُلکاں‘ چہ تُرس ہست۔ آ دیمروی نَہ کُتگیں مُلکاں معاشی ءُ سیاسی نگیگی ءِ بُن اصلی سبب سرپد بنت۔ اے رِدا آہاں تُرس اِنت کہ دیمروی نہ کُتگیں مُلک آہانی (تُرکی، انڈیا ءُ ایدگہ) سیمسراں مہ گہین اَنت۔ چہ اے وڑی ءَ تُرکی، انڈیا ءُ ایدگہ مُلک دیمروی نہ کُتگیں مُلکانی دزمانجنی ءَ چہ وش نہ اَنت۔ بلئے دیمروی کُتگیں مُلکاں وت وتی مُلک ءَ دزمانجنی ءِ دعوت دینت کہ دیمروی کُتگیں مُلکانی دزمانجنی آہانی ہم دیمروی ءِ عِلّت بیت۔
دیمروئی کُتگیں مُلکانی دزمانجنی ماں دیمروی نہ کُتگیں مُلکاں یک جوازے ءَ گوں بیت، ءُ اے دیمروی ءِ مُزّ مہلوک ءِ بہر ءَ نہ کپیت بلکیں ہما ہزگاراں رسیت کہ اِستان ءِ پیمءُرہبند ءَ گوں ہمگرٛنچ اَنت۔ مہلوک پہ اے کار ءَ تیار کنگ بیت کہ پہ وتی گہبود ءُ رکینگ ءِ درگتءَ وتی دُراہیں طاقتاں ہزگار ءَ بِہ دنت۔ اے رِدا ہزگارانی ٹہینتگیں کسانیں دنیا رَکَّ اَنت ءُ رَکینگ بنت۔ اے نوبتاں ٹہینتگیں کسانیں دنیا ءِ ہُدابنداں ما نیولبرل گوٛشیں۔ مئے حساب ءَ اگاں سیاست فکرشناسیں (آئیڈیلسٹک) بنیادے ءَ گوں ٹہینگ بُوَگ ءَ اِنت گڑا اے سیاست ءِ ’دِلواہیں منزل‘ ہمے نیولبرلزم ءِ ترٛاشتگیں لیکہ اِنت کہ دنیا ءَ داں ہما وہد ءَ وتی گاماں نہ بارت گوں داں کہ دیمروی نہ کُتگیں دنیا وتی یکشلیں نوبتانی رِدا ہستیں سٛیادیاں چہ وتا مہ سِندیت۔ اے نبشتانک ءَ ما نوم چومسکی ءِ سیاسی رِدا گیشینتگیں فلسفہ ءَ اے وڑ بیان کنیں کہ ’اگاں ما نیولبرلزم ءَ اے وڑا بِہ چاریں کہ اے کُجا اِنت ءُ کُجا موجود اِنت، گڑا پہ ہزگاراں نیولبرلزم یک مِتھے ۔ کہ ہزگاراں چہ مارکیٹ ءِ فورس ءَ، پہ وتی رکینگ ءَ، بازیں ہُنرے سازِیتگ ءُ بازیں راہے کَشِّیتگ۔ بلئے پہ نیزگاراں نیولبرلزم یک مِتھے نہ اِنت، پرچاکہ ایشی ءَ نیزگار ویران کُتگ اَنت‘۔
نیولبرلزم پہ ہزگاراں پمیشکا یک مِتھے کہ ہر ہزگارے وتی کاروبار ءَ گیش کنگ لوٹیت ءُ (اے درگتءَ) پہ آہاں یک راجمانی پیمانے ءِ بُوَگ ہم تاوان باری ئے زانگ بیت۔ پرچا کہ آ ’راجمانی پیمان ءَ گوں، وتارا نیزگار ءِ نیزگاری ءِ ذمہ دار سرپد بنت۔ اے رِدا ہزگار راجمانی پیمان ءَ یورپ ءِ سرزمین ءِ یا کونٹیننٹل ءِ یک ربیتے لیکیت ءُ دائم پیمان ءِ ہلاس کنگ ءِ حق ءَ اِنت‘۔ بلئے نیزگار راجمانی پیمان ءَ یلہ دات نہ کنت۔ پرچاکہ آئی ءِ گوٛرا نہ سرکار جیڑہے، نہ آ راجمان ءِ نہ بُوَگ ءَ شَرّیں چیزے سرپد بیت؛ ءُ نہ نفر وتی ذمہ دار وت اِنت۔ بلئے پہ ہزگاراں ’سرکار یک جیڑہے، راجمان ءِ بُوَگ معنا نہ داریت ءُ نفر وتی ہر کار ءِ ذمہ دار وت اِنت‘۔
اے وڑیں حال ءَ ’مزنیں کاروباری مردم ءُ ہزگار یک اَنچیں کسانیں اِستانے ءِ تہا ردوم گِر اَنت‘ کہ اے اِستان ءَ گہبود ءُ شہریانی زند بی٘رگا ہمیشانی دست ءَ بنت۔ آہانی نِزّ ءَ پہ مہلوک ءَ شَرّی ہم ہمیش اِنت کہ ہمیشانی وتواجہی ءِ ساہگ ءَ وتی زند ءَ بُگوٛازین اَنت ءُ وطن دوست بہ بنت۔ آہانی گوٛرا وطن دوستی ءُ طاقتور بُوَگ ءِ معنا ہم ہمیش اِنت کہ مہلوک آہانی وتواجہی ءَ بِہ مَن اَنت۔ اے وڑیں اِستان ءَ نوم چومسکی نینی اسٹیٹ گوٛشیت۔ اے اِستان وتی ہمے حدّانی تہا اَنچیں اِستانے بیت کہ (وتی بستگیں ءُ رَکینتگیں ’سیکیورڈ‘ لیکہاں ابید) نوکیں فکر ءُ بدلی ءَ ہچ وڑا نہ منّیت، بزاں کنزرویٹیو بیت‘۔
اَنچوکہ امریکہ مروچاں نیولبرلزم ءِ رِدا اِستان ءَ گیٛگ کنگ ءَ اِنت۔ ’آئی ءَ چونائیا کنزرویٹیو آرڈر دومی جہانی جنگ ءَ پد برجاہ داشتگ کہ ہژدری ئیں وڑے ءَ ہر ہما جنگ ءَ نیست ءُ نابود بہ کنت کہ آئی ءِ آرڈر ءِ دیما کی٘ت ءُ آئی ءَ دارگ لوٹیت…. اے رِدا آ ’ہر ہما مُچّی ءَ نِزور کنان اِنت کہ مہلوک ءِ قدرانی گپ ءَ جنت ءُ مہلوک ہم ہمائی ءِ پلّامرزی ءَ کنت۔ بزاں امریکہ یونین، پاپولر آرگنائزیشن، راجمانی صلح ءُ شَرّی ءَ گوں ہمگرٛنچیں کار ءَ ہوار چوشیں جمہوریتے ءَ ہم رُدگ ءَ نی٘لیت کہ اُودا جمہوریت حالت ءُ تجربہانی بنیاد ءَ محکمی ءَ گوں ردوم بِگریت …. امریکہ وتی اے نیولبرل ءُ کنزرویٹیو آرڈر ءَ گوں سرجمیں دنیا ءِ سرا وتی ٹہینتگیں رہبنداں مُشَّگ ءَ اِنت‘۔ پہ اے کار ءِ برجاہ دارگ ءَ حاکمیں مُلک (امریکہ ءُ آسٹریلیا ءِ مثال ءَ بُزُور) پَدمنتگیں مُلکانی تہا انڈسٹریل جمہوریت ءَ آرَگ ءُ سر کنگ ءَ اَنت۔
اے وڑی ءَ ’حاکمیں مُلک ءِ دزمانجنی سیاسی ءُ اخلاقی رِدا پکّہ بُوَان اَنت‘۔ امریکہ ءَ اے کار ’مارشل پلان ءِ رَنگ ءَ برجاہ داشت‘۔ چونائیا جمہوریت ءِ اے فکر ءَ گوں، حاکم آزات اِنت، ہرچی لوٹیت؛ ہما وڑ کنت‘۔ اے آزاتی ءِ برجاہ دارگ ءَ ’پرائیوٹ ءُ کورپوریٹ پاؤر گیش کنگ بوتگ اَنت‘۔ چونائیا ہمے طاقت پدا حاکمیں ملک ءِ سیاسی طاقت زانگ بیت۔ حاکمیں ملک (ہستیں وہد ءَ امریکہ وتی نیولبرل پالیسیانی رِدا) اے واہش ءَ پَدمنتگیں ملک ءِ مہلوک ءَ سر کنگ ءَ اِنت کہ ’جوٛانیں جُہد ءُ جفائے ءَ گوں نفر وتی نیزگاری ءِ جنجال ءَ چہ وتا کَشِّت کنت، پرچاکہ نفر وہدے ودی بوتگ، اے جنجالے گون اَنت گوں‘۔ ایشی ءِ تچکیں معنا ہمیش اِنت ’امریکہ اِنت کہ نیزگار ءَ ہزگار کنت‘، اے نفر ءِ ذمہ داری اِنت کہ وتی ہزگاری ءِ ذمہ داری ءَ بہ زُوریت۔
پدا اے ذمہ پدمنتگیں اِستان ءِ بیت کہ انڈسٹریل جمہوریت ءَ قبول بہ کنت۔ اے وڑا پالیسی سازیں فیصلہانی سرا نفر ءِ ذمہ داریانی اثر مانیت۔ ’ہزگاری ءِ نیمگا الکاپ ءَ دلگوش بُوَگ، چونائیا طاقتور بُوَگ ءِ نشانی اِنت‘…. چہ ایشی ءَ ’پالیسی سازی ءِ تہا ہزگار ءِ لوٹ ءُ طاقت ءَ پلّامرزی رسیت‘۔ اے لیکہ ءِ رِدا مئے زمانگ نیولبرلزم ءِ زمانگ لیکگ بیت‘۔ اے نیام ءَ اِستان ءِ کار تہنا ہمیش بیت کہ ہزگارانی لوٹ ءِ رِدا آہاں دائم ہر وڑیں جنجالاں چہ بِہ رَکینیت‘۔ اے نیام ءَ پہ مہلوک ءَ دُرٛستاں مستریں مڈی ہمیش بیت کہ تعلیم ءِ اَنچیں نظامے بہ بیت کہ آ نفر ءَ مارکیٹ ءِ نیمگا بہ بارت ءُ اے درگتءَ پہ کارگُشادی ءَ یک بزنس ماڈلے بہ بیت کہ اے ماڈل ءِ تہا مزدوری سک لچکدار بیت، بزاں مزدور ءَ پہ ہر کار ءَ گُشاد بُوَگی اِنت۔ اے ماڈل نالج اکانومی ئیگ اِنت۔ ’چونائیا کپیٹلزم ءِ اے رہبند پہ بزنس کلاس ءَ اَنت، بلئے سرجمیں راجمان ءِ سرا مُشَّگ بنت پرچاکہ ہر نفر ہزگار اِنت۔
اے وڑیں ساعتاں ’نیوکلیئر سلاہ ءِ بُحران ءُ جنگّ زندگ کنگ بنت کہ نیوکلیئر سلاہ ءِ بُوَگ پہ اِستان ءَ اَلّمی اِنت‘ بلئے اے پہ ’یک کرامتے ءَ کم نہ اِنت کہ ما نیوکلیئر دؤر ءَ انگت زندگیں‘۔ اے وڑیں ساعتاں ایمنی دائم نہ مانیت۔ گوں نیولبرل رہبنداں نوں ما پہ وتا مَنتگیں ایمنی ئے (وڑے نہ وڑے ءَ پہ حاکم بُوَگ ءَ) شوہاز کنیں۔ اَنچوکہ مروچاں مئے گوٛرا فیمنزم ءِ نام ءَ گپ ءُ لیکہے پہ گچین ءَ پمیشکا برجاہ دارگ بُوَگ ءَ اِنت کہ اے لیکہ (کم چہ کم) مارا یک کسانیں دنیائے ءَ حاکم ہم کنت ءُ رکینیت ہم۔ منی نِزّ ءَ اے مثال پہ مُلاہاں ہم برابر اِنت۔ مئے گوٛرا فیمنزم ءَ پمیشکا ارزشتے رَستگ کہ اے پہ مارا گچینے ٹہینگ ءَ اِنت۔ پدا اے گچین ءَ گوں مارا ٹہینتگیں ذمہ داری ئے ہم دیّگ ءَ اِنت کہ ما وتی کُجام چیزاں جَہل بہ جنیں ءُ پہ وتا یک گچینی ذمہ داری ئے بُہ شوہازیں کہ اے ذمہ داری مارا ایدگراں چہ بُرز تر بکنت۔
اے درگتءَ فیمنزم ءِ بنیاد ءَ فیمنزم ءِ پلّامرزانی عقلی رِدا حاکم یا بُرزتریں مقامے ءَ بُوَگ ءِ سما، اے وڑا ٹہینگ بیت کہ ’تو‘ چہ زمانگاں لگتمال ئے۔ نوم چومسکی ءِ رِدا اے حاکمی ءُ بُرزتری ءِ مقام آئی ءَ اَنچیں ساعتانی دیمپان کنت کہ آ پہ وتی لگتمالی ءَ گیشتر سرپدی یکجاہ بہ کنت۔
اے سرجمیں جنگّ حاکم ءُ بُرزتریں مقامے ءِ واہُند بُوَگ ئیگ اِنت۔ نوم چومسکی گوٛشیت ’اگاں ما وتی بُنُّکی اخلاقی ذمہ داریاں بِہ زانیں‘ گڑا مارا اے مقام ءُ حاکمی درکار نہ بیت۔ مئے بنداتی ذمہ داری ہمیش اِنت کہ ’مارا پہ آہاں ہچ وڑیں دیمپانی ئے ءِ حاجت نہ اِنت‘۔
اے گپّاں من وتی گوٛرا اے وڑ چاراں ءُ ایشاں چوش پہ آسرے ءَ زُوراں کہ مئے ملٹری اینڈ سِول بیوروکریسی ہر ہما جاہ ءَ (مُلک ءِ تہا) کسانیں دنیا ئے جوڑ کنگ لوٹ انت، اُودا وتی دنیا ءَ جوڑ کن اَنت۔اے دنیا ءِ آترٛاپ ءِ دُرٛاہیں آبادی ءَ پہ وتی کسانیں دنیا ءِ رکّینگ ءَ کار بند اَنت۔ اے کسانیں دنیا اے وڑا رَکّت کنت کہ وہدے آترٛاپ ءِ آبادی (بزاں مہلوک) وتا بُہ پٛروشیت ءُ ہمیشانی دست ءَ بہ دنت۔ اے وڑا مہلوک پہ حاکماں یک اَنچیں مُچّی ئے کہ ناگہاں اے طاقتور بوت گڑا کسانیں دنیا (بگندئے) رَکّت مہ کنت۔ بزاں مہلوک ءِ طاقتور بُوَگ اے کسانیں دنیاہانی ناسلامتی ءِ مانزمان بیت۔ پمیشکا اے درگتءَ گہبود ءُ سلامتی ءِ ساعتاں مہلوک یک اَنچیں مُچّی ئے زانگ بیت کہ ’گہبود ءُ سلامتی‘ ءَ گوں سٛیادی نہ داریت کہ انگریزی ءَ اے عمل ءَ ’’درآمد یا اِرریلیوینٹ‘‘ گوٛش اَنت ءُ ما ایشی ءَ بےدرگت گوٛشیں۔ پرچاکہ گہبود ءُ سلامتی مہلوک ءَ قدری ءُ مقداری طاقت دنت۔ سالانی بےدرگتی ءَ پد ہم یک مُچّی ئے انٹیلی جنشیہ ءِ دستاں وتا پمیشکا ہمگرٛنچ ( اے بنیاد ءَ) کنت کہ آ وتی واجہانی سلامتی ءِ مانزمان اِنت ءُ اے مقام پہ آئی ءِ رُژنائیں عاقبت ءَ دِلواہیں زندے ءِ مانزمان اِنت، گڑا قدر تکنیکی رِدا پہ ہمے واجہاں مانیت ءُ مہلوک بےقدر بیت۔ اے بنیاد ءَ بچارئے گڑا زانگ بیت کہ اے مہلوک دو نیمگاں چہ قدراں زبہر اِنت:
1 ۔ مہلوک کہ چونائیا پہ واجہانی کسانیں دنیا ءِ رکینگ ءَ دائم نٛدرئیگ اِنت؛ ءُ سلامتی ءُ گہبود ءَ زبہر بُوَئگ ءَ گوں قدرانی زبہری ءَچہ نہ اے مُلک ءَ گوں سٛیادی داریت ءُ نہ ہمگرٛنچ اِنت
2 ۔ ایشی ءِ جند ءِ نگاہ ءَ ’قدر‘ ءِ حقدار تہنا درجابندی ءِ بُرز ءِ پلّہ (اسٹیج) ءَ سر بوتگیں واجہ اَنت۔ اے ’بےقدری‘ ءَ دِلوائیں ساعتانی رِدا ملمہ کنگ ءَ مہلوک وتی یکشلیں سِپتاں بیگانہ اِنت۔ پمیشکا اے مہلوک ءِ گوٛرا شنابیں (ہوریزینٹل) انصاف ءِ لیکہ کارآمد نہ بیت؛ ءُ ہما فکری بنیاد کہ شَرّ ءُ کارآمد زانگ بنت ءُ انسان ءَ ’یک روانے‘ ءِ تہا انسانی عملانی حدءُبندانی گیشّینگ ءِ سبق ءَ دینت، اے ہم پوچ (ابسرڈ) بنت۔ اے بیگانگی (بقول نوم چومسکی) ہما وہد ءَ ہلاس بیت ءُ انسان ہوش کنت وہدے آ بہ زانت کہ ’مارا پہ آہاں ہچ وڑیں دیمپانے ءِ حاجت نیست‘۔