بلوچی زبان ءِنوک باہندیں نبشتہ کار جمال منظور جوانیں وانوک ءُ زانت کاریں نبشتہ کارانی رم ءَ ہوار بیت ۔ جمال منظور ءِ نوک اتکگیں کتاب ” آمود‘‘ مبارک قاضی ءِ شعری ازم ءِ گیشواری ءَوانوکاں جوانیں راہدربری ئے کنت۔”آمود“ ءِ تہاتہنا مبارک قاضی ءِ شاعری ءِ بابتءَ ترٛان نہ بوتگ، بلکیں شعر ءِ معنا کنگ ءِ وڑ ءُ ڈول، یا شعر ءِ تہا کارست سازی ءُ کارستءِ گالوار ، آئی ءِ تب ءُ مئیل، نفسیات،شعر ءِ مزاج، شعر ءِ مزنی ءُ کسانیءَ سرپد بوئگ لوٹ اِت ،گڈا جمال ءِ کتاب”آمود“ءَ الّمابہ وانیت۔پرچاکہ جمال ءِ کتاب ءَشرگداری ءِ دُرٛاہیں داب گندگ بنت۔شرگدار ءِ کار شعر ءِ تچکءُ پلگار کنگ، شعرءِ معنا کنگ، شعرءِ ازمی لوٹانی چارگءُ تپاسگ اَنتءُ اے کار جمال منظور ءِ کتابءَ شرّیں درٛوشمے ءَ گندگ بنت۔
مبارک قاضی معنا ءِ شاعر اِنت ءُ معنا ءِ شاہیگانی ءِ سرا باز زور دنت ۔آ مزنیں لیکہ، مزنیں فلسفہ،ءُ پگر زوریتءُ شعر نویسیت ءُ وانوک پہ شعر ءِ معناسازیءَ جیڑہانی آماچ بیت۔ اگاں وانوک اے رنگیں فلسفہ ءُ پگرانی بابتءَ سرپدی مہ داریت ،گڈا آ قاضیءَ معنا کرت نہ کنت۔ بلئے اے رنگیں جیڑہ ” آمود “ ءِ آہگءَ رند کمے ارزان ءُ آسان بوتگ اَنت۔ گوٛشگءِ مطلب ایش اِنت ’’آمود‘‘ ءِ تہامبارک قاضی ءِشعر نوکیں رنگےءَ تپاسگ ءُ دیمءَ آرگ بوتگ اَنت۔
بلوچی لبزانکءَ شرگداری ءِ پڑءَمدام شرگداراں روایتی ڈولءَ شرگداری کرتگءُ باز چہ بلوچءِ شرگداری سنچءُ لیکہاں دورءُ گستا ءُ دری قوم ءُ راجانی لیکہ زرتگءُ ساچشتءِ سرا ترٛان کرتگ۔ بلئے اے کتابءَ روایتی ءُ دری راجانی لیکہ زورگءُ شعر تپاسگ نہ بوتگ اَنت ءُ ناں کہ جمالءِ شرگداری سنچ ءُ بود لس ءُ روایتی ڈولءَ اِنت ۔بزاں جمال ءَ چہ بلوچی کلاسیکل شاعریءَ شرگداری رہبند درجتگ اَنتءُ ”آمود‘‘ءِ تہا دیمءَ آورتگ اَنت۔ہمے نوکیں رہبندانی تہا یکے کارست ءُ گالوار(Character ,Tone) اِنت کہ چدوپیسر اے ڈولیں شرگداری بلوچی لبزانکءَ نہ بوتگ ءُ ناں کہ کارستءِ گالوار ءِ بابتءَ کسے تران کرتگ۔اے وڑیں بازیں رہبند جمال ءِ کتابءَ بحثءُ تران بوتگ اَنت۔اے نوک درجتگیں رہبند ءُ لیکہ پہ بلوچ راج ءُ بلوچی لبزانکءَ نوک اَنت ۔
چہ ایشی ءَ ابید، جمالءَ جہد کرتگ ءُ بلوچی کلاسیکل شاعری ءِ کارستانی گالوار ءُ مبارک قاضی ءِ کارستانی گالوار دیم پہ دیم کرتگ اَنت ء ُشرگدار ہمے آسرءَ سر بوتگ کہ مبارک قاضی کلاسیکل شاعریءَ سستگ ءُ گستائیں شاعرے نہ اِنت، بلکیں قاضی کلاسیکل شاعری ءَ دیمروئی دنت۔ چشکہ بالاچ گونگیں کارست مبارک قاضی ءِلچہ”کلیشن کوف“ءِ تہا، شے مرید ءِ ہانی ءُ قاضیءِ”ہانی منی ماتیں وتن“،میر کمبر ءِ مات ءِ کارست ءُ قاضی ءِکارست” من بلوچیں ماتے آں“ءُ دگہ بازیں کارست نوکیں رنگےءَ مبارک قاضیءَسازیتگ اَنت ءُ جمال منظورءَ اے نوک سازیتگیں کارستانی شناس ’’آمود‘‘ تہا کرتگ۔
مبارک قاضیءِ شعرانی تہا یک کارستے پیر مرد اِنت کہ باز جاہءَ گندگ بیت ۔ اے کتابءِ تہا اے گوٛشگ بوتگ کہ اے کارست مبارک قاضی ءِ Mouthpiece اِنت۔
جمال ءِ اے کتاب پہ بلوچءُ بلوچی لبزانکءَ نوکیں چیزے ءُ اے ڈولیں کار بلوچی لبزانکءَ دیمروئی دنت۔