پاکستان ءِ دری کارانی کارگس ءِ نیمگا شنگ بوتگیں بیان ءِ ردا پاکستان ءِ دری کارانی وزیر اسحاق ڈار ءُ چین ءِ نیشنل پیپلز کانگریس ءِ قائمہ کمیٹی ءِ وائس چیئرمین زینگ جیان بینگ ءِ گیمبیا ءَ اسلامی تعاون تنظیم (او آئی سی) ءِ 15 می اسلامی سربراہی کانفرنس ءِ درگت ءَ گند ءُ نند بوتگ۔
دری کارانی کارگس ءِ گوٛشگ انت کہ دوئیں فریقاں وت ماں وتی نپ ءُ سیت ءِ ہاترا نزّیکیں اقتصادی تعاون ءِ ذریعہ ءَ وتی سیادیاں مہکم کنگ ءِ ارزشت ءِ بابت ءَ زور داتگ۔ دوئیں فریقاں پاکستان ءُ چین ءِ درمیان ءَ مہکمیں تعاون ءَ ہمگرٛنچیں شریداری ءِ ہم توثیق کتگ ءُ پاکستان ءِ پارلیمنٹ ءُ چین ءِ نیشنل پیپلز کانفرنس ءَ درمیان گیش بوؤکیں نزیکیانی بابت ءَ گپ ءُ ترٛان کتگ۔
بیان ءَ گوٛشگ بوتگ کہ گند ءُ نند ءِ دوران ءَ دوئیں ملکاں سی پیک ءِ منصوبہانی درگت ءَ کمک ءُ تعاون ءَ گیش کنگ ءِ واہگ درشان کتگ۔
زانگ بہ بیت کہ سی پیک ءِ گیشتریں منصوبہ بلوچستان ءَ اَنت ، بلئے بلوچستان ءِ مردمانی گوٛشگ انت کہ چہ اے منصوبہاں بلوچستان ءِ مردماں ہچ وڑیں نپ ءُ سیت رسگ ءَ نہ انت ، گوادر کہ سی پیک ءِ مرکز انت اودا ہم مردم آپ ، لین گیس ، روڈ ءُ اے دگہ بُنکی آسراتیاں زبہر اَنت۔