بلوچستان ءِ سروزیر میرسرفراز بگٹی ءَ گوٛشتگ کہ صوبہ ءَ گورننس ءِ گہتری ءِ واستہ گامگیج زورگ ءَ ئیں۔ اے درگت ءَ صوبائی حکومت ءِ نیمگا 60 ءَ گیش انچیں اصلاحاتانی شور ءُ سلاہ رستگ کہ آہانی سرا عمل بوت کنت کہ آہانی بابت ءَ گوں اسٹیک ہولڈراں گپّ ءُ ترٛان بوئگ ءَ اِنت۔
کوئٹہ ءَ گوں بلوچستان سول سروس آفیسرز برانچ ویلفئر ایسوسی ایشن ءِ نمائندہانی وفدے ءَ گوں بلوچستان ءِ سروزیر ءَ گند ءُ نند کتگ ، گوں وفد ءَ گپ ءُ ترٛان کنان ءَ میر سرفرازبگٹی ءَ گوٛشتگ کہ بیوروکریسی حکومتی گامگیج ءُ پالیسیانی سرا عملدرآمد کنگ ءَ مرکزی کردارے ءِ واہند انت پمشکہ اے اصلاحاتانی وژن ءِ بابت ءَ افسرانی کمک ءُ تعاون بے کساس المی انت۔
سروزیر ءَ گوٛشتگ کہ آفیسر قانون ءِ حلاپ ءَ ہچ وڑیں گامگیج ءِ پلّہ مرزی مہ کن انت ، میرٹ ءِ دیمروئی ءَ گامگیج بہ زُور اَنت اے بابت ءَ بندات ءَ بازیں مشکل ءُ جنجال دیما کاینت بلے سوب الّما رہبند ءُ اصولانی بیت۔
زانگ بہ بیت کہ بلوچستان ءَ گڈ گورننس ءِ سک باز کمی انت ، وانگ ءُ زانگ ، جانسلامتی ، کشت ءُ کشاری ، لاء اینڈ آرڈر ءِ فورسز ءِ ادارہاں بیا سک باز بے رہبندی گندگ بیت ءُ بازیں ادارہ کرپشن ءَ بلوچستان وتی جاہ ءَ سرجمیں پاکستان ءَ گیشتر کرپٹ ءُ بے رہبند انت۔