احوالکارانی میاں اُستمانی روچ ءِ درگت ءَ پہ احوالکاراں کار کنوکیں گل رپورٹر ود آؤٹ بارڈرز ءِ نیمگا سرجمیں دنیا ءَ احوالکارانی سرا گیش بوؤکیں سیاسی جبر ءُ احوالکارانی آزادی ءِ سرا جتگیں بندشانی بابت ءَ مزن دلگرٛانی درشان کتگ۔
سرجمیں دنیا ءِ احوالکارانی بدحالیءَ گوٛستگیں سال ءِ بدل ءَ اے سال ءَ مزنیں گہتری ئے گندگ نہ بوتگ۔ پہ احوالکاراں کار کنوکیں گل رپورٹر ود آؤٹ بارڈرز ءِ نیمگا شنگ بوتگیں رپورٹ ءَ گوٛشتگ کہ سرجمیں دنیا ءَ احوالکاراں چہ وتی سیاسی رہشونانی نیمگا خطرہ ہست۔ گیشتریں حکومت ءُ سیاسی رہشون چشیں چاگردے جوڑ کنگ ءَ بے سوب بوتگ انت کہ احوالکاری ءَ تحفظ بہ رسیت ءُ اودا مردماں بیسہی ، بے پلہ مرزی ءُ ہر وڑیں حال سر بہ بنت۔ ریاست ءُ سیاسی دارہانی دباؤ ءِ سبب ءَ میڈیا ءِ آزادی کم تر بوہان انت۔
رپورٹ ءِ ردا 2023 ءَ غزہ ءَ جنگ ءِ بندات بوئگ ءَ گوں 100 ءَ گیش احوالکار بیران بوتگ۔
احوالکارانی میاں اُستمانی روچ ءِ درگت ءَ شنگ بوتگیں رپورٹ ءَ رپورٹر ود آؤٹ بارڈرءَ 22 می سالانہ رپورٹ ءَ پہ احوالکاراں جوان تریں ملک ناروے ءُ ایسٹ افریقی ملک اریٹریا درٛستاں بدتریں ملک قرار داتگ۔
گوٛستگیں سال ءَ درٛستاں جہل تریں درجہ ءَ آؤکیں ملک گوریچانی کوریا اے سال ءَ دو درجہ گہتر بوتگ ءُ 177 می درجہ ءَ اتکگ۔ ہما ملک کہ رینکگ ءَ جہل اتکگاں آہانی تہا افغانستان 26 درجہ جہل اتکگ ءُ 178 نمبر ءَ اتکگ۔ ٹوگو 43 درجہ جہل 113 نمبر ءَ ، ایکواڈور 30 درجہ جہل ءَ 110 نمبر ءَ ءُ ارجنٹائن 26 درجہ جہل ءَ 66 نمبر ءَ اِنت ۔ امریکہ ءَ درجہ بندی ءَ 10 درجہ کمی بوتگ۔
جہلی درجہ ءَ 10 ملک چین ، ایران ، شمالی کوریا ، شام ءُ اریٹیریا ہوار انت۔ اے ملکاں ریکارڈ حساب ءَ احوالکار دزگیر کنگ بوتگ انت۔ بیگواہ یا آوار جنگ بوتگ انت۔ میکسیکو پہ احوالکاراں انگتہ بدتریں ملک قرار دیگ بوتگ کہ اودا 2019 ءَ داں انگتہ 37 احوالکار جنگ بوتگ۔
ایشیا پیسیفک ءِ دمگ پہ احوالکاراں دومی بیمناک تریں دمگ قرار دیگ بوتگ۔ اے دمگ ءَ دنیا 10 بیمناک تریں ملکاں 5 ملک ہمدا انت کہ آہانی تہا میانمار 171 می ، چین 172 می ، گوریچانی کوریا 177 می ، ویت نام 174 می ءُ افغانستان 178 می ہوار انت۔
رپورٹر ود آؤٹ بارڈر ءِ ردا احوالکاری ءِ حساب ءَ مشرق وسطیٰ ءُ افریقہ ءَ جاورحال درستاں گنتر بوتگ ءُ یورپ چہ درٛستاں محفوظ تر بوتگ۔