احوالکارانی میاں اُستمانی روچ ءَ خضدار پریس کلب ءِ صدر ءُ سینئریں احوالکار بم ترٛاک ءَ بیران بوتگ ۔ دو رہگوٛزیں برٛات ہم ترٛاک ءِ زد ءَ اتکگ ءُ بیران بوتگ انت۔
پولیس ءِ گوٛشگ انت کہ خضدار پریس کلب ءِ صدر مولانا محمد صدیق مینگل جمعہ ءِ روچ ءَ قومی شاہراہ ءَ گوٛزگ ءَ بوتگ کہ آئی ءِ گاڑی میگنٹ بمب ءِ نشانگ کنگ بوتگ ، میگنٹ بمب ءِ ترٛکگ ءَ گوں مولانا محمد صدیق مینگل ہما وہد ءَ بیران بوتگ ، ترٛاک دگہ 9 مردم ٹپی بوتگ۔
پولیس ءُ قانون برجم داروکیں ادارہ واقعہ ءِ جاہ ءَ سر بوتگ انت۔ بیران ءُ ٹپی بوتگیں مردم ٹیچنگ اسپتال خضدار ءُ خضدار ٹراما سنٹر ءَ سر کنگ بوتگ انت ۔ ءُ دمگ انگراں زُرتگ واقعہ ءِ پٹ ءُ پول بندات کتگ۔
ہسپتال ءَ علاج ءِ وہد ءَ خضدار ءِ جاہمنندیں دو برات محمد وارث ءُ محمد کریم ہم بیران بوتگ انت۔
مولانا محمد صدیق مینگل پریس کلب خضدار ءِ سیمی صدر اِنت کہ نشانگی کوش ءِ آماچ بوتگ ، چہ ایشی ءَ پیسر خضدار پریس کلب ءِ دو صدر محمد خان ساسولی ءُ فیض الدین ساسولی ٹارگٹ کنگ ءُ جنگ بوتگ انت۔
گوٛستگیں پانزدہ سالاں انگتہ خضدار ءِ نُہہ احوالکار جتا جتائیں اُرشاں جنگ بوتگ انت۔