عشق ءِ گرٛانیں سفَر کنگ لوٹیت
راہ ئِے دُور اِنت ستَر، کنگ لوٹیت
دل وتی درد ءِ کہرمیں پیچاں
یک پہ یکّ ءَ تپر کنگ لوٹیت
آسر ءِ تُرس ہچّی ءَ نَیلیت
آسر ءِ تُرس در کنگ لوٹیت
ہرکس ءَ نیکی دوست بیت پہ وّت
ہرکسی کار شر کنگ لوٹ اِیت
کئے پہ شوہاز ءَ جند ءِ تُنّیگ اِنت
کئے وت ءَ در پہ در کنگ لوٹیت
کمّے دلگوش، باطن ءِ موسم !
مُرتگیں درٛچک بر کنگ لوٹیت
لامکان ءِ پدانی شوہاز ءَ
لازمانی سفر کنگ لوٹیت
گال ءِ سرگوٛست ءَ جست کن اِت باریں
چیا زیر ءَ زبر کنگ لوٹیت
بام، وابے کہ اندر ءِ رُژن ءَ
گوں شپ ءَ سر پہ سر کنگ لوٹیت
چہ دل ءِ چمّگ ءَ ضیاؔ، حاک ءِ
نُک تلاریں، نوں، تر کنگ لوٹیت