مزن وزیر شہباز شریف ءَ ہر وڑا دہکاں کارانی نپ ءُ سیتاں پہریزگ ءِ جار جتگ ، بلئے بنجاہی حکومت گلّہ ءِ بُحران ءِ میگا اسکینڈل پٹ ءُ پول کنگ ءُ ذمّہ داراںی حلاپ ءَ کارروائی کنگ ءَ پُشت ءُ گوش کنگ ءَ اِنت۔
ڈان روتاک ءِ رپورٹ ءِ ردا گلّہ ءِ درآمد ءِ بے رہبندیانی پٹ ءُ پول ءِ ہاترا جوڑ بوتگیں کمیٹی ءِ سروک کابینہ ءِ سکریٹری کامران علی افضل اِنت۔
مسلم لیگ ن ءِ بنشون ءِ گوٛشگ انت کہ پیسریگیں مزن وزیر ءُ ن لیگ ءِ سروک نوازشریف لوٹگ ءَ اِنت مسلم لیگ ن ءِ حکومت اے میگا اسکینڈل ءَ ہواریں مردمانی حلاپ ءَ چہ ہرچ وڑیں سیاسی اثر ءُ زور ءَ بے پرواہ بہ بیت ءُ کارروائی بہ کنت۔
مسلم لیگ ن ءِ ماڈل ٹاؤن ءَ بوتگیں دیوان ءَ شور ءُ سلاہ دیما اتکگ کہ پٹ ءُ پول ءَ نیب ءُ ایف آئی اے ءِ وڑیں ادارہ ہم اے پٹ ءُ پول ءَ گون بہ بنت۔ بلئے وفاقی حکومت ءِ گوٛشگ انت کہ اے وڑیں شور ءُ سلاہ ءِ گپ راست نہ اَنت۔
ڈان روتاک ءِ گوٛشگ انت کہ اے اسکینڈل گوں پیسریگیں نگران مزن وزیر انوارالحق کاکڑ ءَ ہمگرٛنچ انت پمشکہ شریف انتظامیہ گوں حیال ءُ پرواہ گامگیج زُوران اِنت۔
شنگ کاری ءِ وزیر عطا تارڑ ءَ جُست کنگ بوتگ کہ حکومت نیب ءِ ہوار کنگ ءَ پرچا پشت ءُ گوش کنگ ءَ انت ، پرچا کہ نوکیں قانون ءِ ردا اے اسکینڈل 50 کروڑ کلدار ءَ گیشترئیگ اِنت گُڈا پیسریگیں مزن وزیر پرچا طلب کنگ بوئگ ءَ نہ اِنت۔ اے جُست ءِ پسّو شنگکاری ءِ وزیر ءَ نہ داتگ۔
حالانی ردا مسلم لیگ ن ءِ رہشون حنیف عبّاسی ءُ پیسریگیں نگران مزن وزیر ءِ نیام ءَ جنگ ءُ اڑ بوتگ ءُ پیسریگیں نگران مزن وزیر ءَ گوٛشتگ کہ آ فارم 47 ءِ باروا گپ بہ کن انت گُڈا مسلم لیگ ن ءِ رہشون مہلوک ءِ دیما اتک نہ کن انت۔
دومی نیمگا پی ٹی آئی ءِ ترجمان ءَ گوٛشتگ کہ انوارالحق کاکڑ ءُ حنیف عبّاسی ءِ گپ ءُ ترٛان بازیں جُست ودی کنگ ءَ انت ، گلّہ ءِ اسکینڈل ءِ ہر وڑا پٹ ءُ پول کنگ بہ بیت۔
پیسریگیں مزن وزیر انوارالحق کاکڑ اسکینڈل ءِ پٹ ءُ پول ءَ جوڑ بوتگیں کمیٹی ءِ دیما طلب کنگ ءَ پد ہم پیش نہ بوتگ۔